R/Wasaaraha Soomaaliya, Xamse Cabdi Barre, iyo Madaxweynaha Galmudug, Axmed Cabdi Kaariye (Qoorqoor), ayaa la filayaa inay si rasmi ah u shaaciyaan heshiis siyaasadeed oo la xiriira doorashada soo socota ee Galmudug.
Sida ay sheegayaan ilo ka tirsan Dowladda Federaalka Soomaaliya, socdaalka Raysal Wasaare Xamse uu ku tagay deegaannada Galmudug ayaa qayb ka ah dadaallo lagu dhammaystirayo heshiis siyaasadeed oo muddooyinkii dambe laga waday masiirka hoggaanka maamulkaas.
Xogaha la helayo ayaa tilmaamaya in heshiiska laga gaaray arrimaha doorashada iyo kala wareegga hoggaanka Galmudug, iyadoo la sheegayo in Madaxweyne Axmed Qoorqoor uu oggolaaday hannaan siyaasadeed oo lagu maareynayo doorashada maamulka.
Ilo-wareedyo dowladda ka tirsan ayaa xaqiijinaya in kulamo gaar ah oo u dhexeeyay madaxda sare ee Dowladda Federaalka iyo kuwa Galmudug ay saldhig u ahaayeen heshiiskan, kaas oo la filayo in si rasmi ah loogu dhawaaqo maalmaha soo socda.
Heshiiskan ayaa waxaa la rumeysan yahay inuu door weyn ku yeelan doono jihada siyaasadeed ee Galmudug iyo doorashada maamulka ee soo socota.
Waxaa la sugayaa in madaxda labada dhinac ay war rasmi ah ka soo saaraan natiijada wada-hadallada iyo qodobada lagu heshiiyay.
