Wasiirka Wasaaradda Amniga Gudaha ee Xukuumadda Federaalka Soomaaliya, Fartaag ayaa maanta magaalada Muqdisho ku qaabilay dhiggiisa Dowladda Talyaaniga, Matteo Piantedosi.
labada Wasiir ayaa kala saxiixday Heshiis Is-afgarad ah oo lagu xoojinayo iskaashiga labada dal ee dhinacyada amniga, tababarrada Ciidanka Booliska, la-dagaallanka argagixisada, horumarinta hay’adaha amniga, iyo arrimaha socdaalka.
Heshiiska ayaa la sheegay in si gaar ah diiradda u saarayo horumarinta barnaamijyada waxbarashada iyo tababarrada xirfadeed ee Ciidanka Booliska Soomaaliyeed, tayeynta iyo kobcinta aqoonta tababarayaasha Soomaaliyeed si ay iyaguna u tababaraan ciidamada kale, is-weydaarsiga saraakiisha iyo booqashooyinka waxbarasho, iyo is-dhaafsiga khibradaha, aqoonta, iyo hababka ugu wanaagsan ee lagu horumarin karo hay’adaha amniga.
