Dowladda Federaalka Soomaaliya ayaa u yeertay Safiirka Kenya u fadhiya Muqdisho, iyadoo lagu wado inuu maanta Isniinta hortago Wasaaradda Arrimaha Dibadda si looga wada hadlo wararka sheegaya in dhowr wasiir oo ka tirsan Dowladda Federaalka Soomaaliya laga hor istaagay inay galaan magaalada Nairobi.
Sida ay xaqiijiyeen ilo rasmi ah, kulanka ayaa diiradda lagu saari doonaa dhacdo la sheegay inay ka dhacday Garoonka Caalamiga ah ee Jomo Kenyatta International Airport (JKIA), halkaas oo xubno ka tirsan Golaha Wasiirrada Soomaaliya lagu soo warramay in loo diiday inay gudaha u galaan Kenya.
Ilo ku dhow Wasaaradda Arrimaha Dibadda Soomaaliya ayaa sidoo kale sheegay in dowladda ay si rasmi ah ugu yeertay safiirka Kenya si ay uga dalbato sharaxaad rasmi ah oo ku saabsan dhacdada iyo sababaha keenay in mas’uuliyiinta Soomaaliyeed loo diido gelitaanka Kenya.
Dhacdadan ayaa ku soo beegmaysa xilli xiriirka diblomaasiyadeed ee Soomaaliya iyo Kenya uu wajahayo marxalad xasaasi ah, iyadoo la filayo in wada-hadallada Isniinta ay door muhiim ah ka ciyaaraan dejinta xiisadda iyo go’aaminta tallaabooyinka xiga ee labada dowladood.
