Ciidanka Xoogga Dalka Soomaaliyeed ayaa howlgal qorsheysan dib ugula wareegay deegaanka Sumadaale ee degmada Cadale, gobolka Shabeellaha Dhexe, halkaas oo ay fariisimo ku lahaayeen maleeshiyaadka Al-Shabaab.
Howlgalka ayaa ciidamada u suurtageliyay inay maleeshiyaadka Al-Shabaab ka saaraan godadkii iyo fariisimihii ay ku dhuumaaleysanayeen, iyadoo wararku sheegayaan in kooxda ay halkaasi uga baxsatay jab culus.
Ciidamada Qaranka ayaa weli sii wada baacsiga maleeshiyaadkii goobta ka firxaday, si loo xaqiijiyo amniga deegaanka loogana hortago isku day kasta oo ay kooxda dib ugu soo laaban karto.
Howlgallada ka socda gobolka Shabeellaha Dhexe ayaa qeyb ka ah dadaallada Ciidanka Xoogga Dalka Soomaaliyeed ay ku doonayaan inay ku wiiqaan awoodda maleeshiyaadka Al-Shabaab, isla markaana dib loogu soo celiyo amniga deegaannada ay hore uga howlgelayeen.
