Wafdi uu hoggaaminayo Wasiirka Arrimaha Dibadda iyo Iskaashiga Caalamiga ee Dowladda Federaalka Soomaaliya, Cabdisalaam Cabdi Cali (Dhaay), ayaa gaaray magaalada Addis Ababa ee dalka Itoobiya si ay uga qeyb galaan Kalfadhiga 49-aad ee Caadiga ah ee Golaha Fulinta Midowga Afrika.
Shirkan ayaa diiradda lagu saari doonaa arrimo ay ka mid yihiin nabadda iyo amniga qaaradda, dib-u-habaynta hay’adaha Midowga Afrika, iyo xoojinta iskaashiga dhaqaale ee dalalka Afrika.
Wasiirka iyo wafdiga la socda ayaa waxaa si diirran u soo dhoweeyay mas’uuliyiin ka tirsan Wasaaradda Arrimaha Dibadda ee Itoobiya, iyadoo soo dhoweyntaasi ay muujinayso xiriirka diblomaasiyadeed ee u dhexeeya Soomaaliya iyo Itoobiya.
Dowladda Federaalka Soomaaliya ayaa kulanka ku soo bandhigi doonta mudnaanteeda la xiriirta xoojinta iskaashiga amniga, maamulka iyo maareynta arrimaha badda, iyo adkeynta nabadda iyo xasilloonida gobolka.
Sidoo kale, inta uu shirka socdo, Wasiir Cabdisalaam Dhaay ayaa la filayaa inuu kulamo laba geesood ah la yeesho dhiggiisa dalal kala duwan si ay uga wada hadlaan la dagaallanka khataraha xuduudaha ka gudba, xoojinta doorka Midowga Afrika ee ka hortagga colaadaha, iyo horumarinta iskaashiga dhaqaale ee Geeska Afrika.
