Taliyihii hore ee Ciidamada Asluubta Soomaaliyeed, Mahad Cabdiraxmaan Aadan (Taliye Shub), ayaa shir jaraa’id oo uu qabtay ku jeediyay hadallo kulul oo uu kula hadlay hoggaamiyaha maamulka Koofur Galbeed Sheekh Aadan Maxamed Nuur (Aadan Madoobe).
Taliye Shub ayaa ku eedeeyay Aadan Madoobe inuu mas’uul ka yahay xaaladda ka taagan Baydhabo, isagoo ku hanjabay in uusan si nabad ah ugu sugnaan doonin magaalada.
“Haddii aad hal habeen Baydhabo nabad ku seexato, dambiga anigaa leh. Diyaaradaha kuu jooga laguguma deynayo ee dadka ayaa lagu dhameynayaa,” ayuu yiri Taliye Shub.
“Aadan Madoobow Baydhabo nabad kuma seexanaysid, adigaa bilaabay colaada,xabad ayaa wadahadal noo ah,in lagu daayo waa habeenkii xalay tagay, xarigeyga adiga ayaa ka dambeeyay”
Hadalladan ayaa kusoo beegmaya xilli ay sii kordhayaan xiisadaha siyaasadeed iyo kuwa amni ee ka taagan Baydhabo, iyadoo weli aan wax jawaab ah laga helin Aadan Madoobe ama mas’uuliyiinta dowladda ee ku aaddan hadalladaasi.
