Taliyaha Cutubka Booliska Nigeria ee howlgalka Midowga Afrika ee Taageerada iyo Xasilinta Soomaaliya (AUSSOM), Kormeeraha Sare ee Booliska Ibraahim Laba, ayaa sheegay in nabadda Soomaaliya ay si toos ah ugu xiran tahay amniga iyo xasilloonida dalalka kale ee Afrika.
Kormeeraha Sare Ibraahim Laba, oo hoggaamiya cutubka 13-aad ee Booliska Nigeria, ayaa hadalkan ka sheegay magaalada Muqdisho, halkaas oo ciidamada Nigeria ay qeyb ka yihiin howlgalka AUSSOM. Waxaa uu ka howlgalaa saldhigga Al-Jazeera II, oo ay sidoo kale ku sugan yihiin ciidamada Uganda.
Ibraahim Laba ayaa sheegay in ciidamada Nigeria ay Soomaaliya u joogaan inay gacan ka geystaan sugidda amniga, ilaalinta kala dambeynta, roondooyinka wadajirka ah ee lala sameeyo Ciidanka Booliska Soomaaliyeed iyo ilaalinta shaqaalaha AUSSOM iyo Qaramada Midoobay.
“Annaga oo Nigerian ah, waxaan ognahay inaanan weligeen nabad dhab ah ka heli karin dalkeenna haddii Soomaaliya aysan nabad helin,” ayuu yiri Kormeeraha Sare Ibraahim Laba.
Wuxuu tilmaamay in ammaanka dalalka Afrika uu yahay mid isku xiran, isla markaana khataraha amni ee ka jira Soomaaliya ay saameyn ku yeelan karaan dalalka kale ee gobolka iyo qaaradda.
Cutubka Booliska Nigeria ayaa qeyb ka ah ciidamada AUSSOM ee taageeraya dowladda Soomaaliya, iyadoo howlahooda ay ka mid yihiin roondooyinka iyo taageerada Ciidanka Booliska Soomaaliyeed.
Taliyaha ayaa sheegay in wada-shaqeynta u dhexeysa ciidamada Afrikaanka ah iyo hay’adaha amniga Soomaaliya ay muhiim u tahay in la helo xasillooni waarta.
Sidoo kale, wuxuu sheegay in ciidamadiisa ay xoogga saaraan feejignaanta, tababarka iyo caafimaadka maskaxeed ee askarta, maadaama ay ku shaqeeyaan deegaan ay ka jiraan caqabado amni.
Ibraahim Laba ayaa sidoo kale sheegay inuu si shaqsi ah u hoggaamiyay roondooyin ka dhacay qeybo ka mid ah Muqdisho, si ciidamada ay u gaaraan meelaha ay adag tahay in si joogto ah loo tago.
Hadallada taliyaha ayaa muujinaya sida Nigeria ay muhiimad u siineyso xasilinta Soomaaliya, iyadoo AUSSOM ay tahay howlgal Afrikaan ah oo loogu talagalay taageeridda dowladda Soomaaliya iyo xoojinta awoodda hay’adaha amniga dalka.
