Taliyaha Ciidamada Mareykanka ee Afrika (AFRICOM), Jeneraal Dagvin Anderson, ayaa sheegay in Xuutiyiinta Yemen ay qorsheynayaan inay Soomaaliya geeyaan nidaamyo raadaarro ah oo loogu talagalay la socodka dhaqdhaqaaqyada iyo maraakiibta mara xeebaha Soomaaliya.
Sida uu Jeneraal Anderson ku sheegay hadal uu siiyey The Wall Street Journal, nidaamyada raadaarrada ayaa la qorsheynayaa in la geeyo deegaano ay maamusho kooxda Al-Shabaab, iyadoo la sheegay in Xuutiyiinta iyo Al-Shabaab ay sameysteen xiriir iskaashi oo ay qayb ka yihiin tababbarro milatari, hub casri ah iyo diyaaradaha aan duuliyaha lahayn (drones).
Taliyaha AFRICOM ayaa sidoo kale sheegay in Xuutiyiintu ay horey Al-Shabaab ula wadaageen tababbarro heer sare ah iyo qalab casri ah oo dagaal, taasoo Washington ay u aragto tallaabo sii xoojinaysa xiriirka labada kooxood.
Jeneraal Anderson ayaa intaa ku daray in Al-Shabaab ay isku dayeyso inay isu beddesho khatar ka gudubta xuduudaha Soomaaliya, isagoo sheegay in Mareykanku kulamo albaabadu u xirnaayeen uu dalalka gobolka Geeska Afrika kula wadaagay walaaca laga qabo xiriirka sii xoogeysanaya ee u dhexeeya Al-Shabaab iyo Xuutiyiinta.
Wuxuu sheegay in Mareykanku uu bilaabay howlgallo lagu beegsanayo shabakadaha iyo xubnaha fududeynaya xiriirka labada kooxood.
Taliyaha ayaa xusay in horraantii sanadkan duqeyn ka dhacday deegaan ku yaalla qiyaastii 50 KM dhanka Kismaayo, lagu dilay sarkaal sare oo Al-Shabaab u qaabilsanaa xiriirka Xuutiyiinta. Sida uu sheegay, sarkaalkani wuxuu door ku lahaa isku xirka taageerada ay Xuutiyiintu siinayaan Al-Shabaab, iyadoo labada dhinac ay sidoo kale doonayaan inay xiriirkooda uga faa’iideystaan dhaqaale iyo saameyn ay ku yeeshaan goobo ka baxsan Yemen.
Iskaashiga Xuutiyiinta iyo Al-Shabaab wuxuu noqon karaa isbeddel cusub oo ku yimaada khatarta amni ee Badda Cas, Gacanka Cadmeed iyo Geeska Afrika, gaar ahaan haddii kooxahaasi helaan awood ay ku la socdaan dhaqdhaqaaqa maraakiibta iyo isku xirka weerarrada badda iyo dhulka.
