Soomaaliya iyo 18 dal oo kale ayaa si wadajir ah u cambaareeyay go’aanka dowladda Colombia ay safaaraddeeda Israa’iil ugu furtay magaalada Qudus, iyaga oo ugu baaqay Bogotá inay dib uga laabato tallaabadaas oo ay sheegeen inay ka hor imanayso qaraarrada Qaramada Midoobay.
Bayaanka wadajirka ah oo ay wasiirrada arrimaha dibadda ee 19-ka dal soo saareen 16-kii Oktoobar 2026 ayaa lagu sheegay in furitaanka safaaradda Colombia ee Qudus uu wiiqayo dadaallada caalamiga ah ee lagu doonayo in lagu gaaro nabad waarta oo caddaalad ku dhisan, taas oo saldhig u ah xalka labada dowladood ee Israa’iil iyo Falastiin.
Colombia ayaa 14-kii Oktoobar 2026 si rasmi ah safaaraddeeda uga furtay Qudus, iyadoo uu munaasabadda ka qeybgalay wasiirka arrimaha dibadda Israa’iil, Gideon Sa’ar, iyo dhiggiisa Colombia, Omar Bula Escobar. Tallaabadan ayaa qeyb ka ah dib u soo celinta xiriirkii diblomaasiyadeed ee labada dal, kaas oo dib loo soo celiyay bishii Agoosto 2026.
Wasiirrada arrimaha dibadda ee 19-ka dal ayaa bayaankooda ku caddeeyay in tallaabo kasta oo lagu beddelayo xaaladda sharci iyo taariikheed ee Qudus-ta Bariga ee la haysto, ama magaalada loogu aqoonsanayo caasimadda Israa’iil, ay tahay mid aan sharciyad lahayn, isla markaana aan lahayn wax saameyn sharci ah.
Dalalkan ayaa sidoo kale ku boorriyay dowladda Colombia inay dib u eegto go’aankeeda, kana laabato, iyada oo la ilaalinayo sharciga caalamiga ah iyo xuquuqda shacabka Falastiin, gaar ahaan xaqa ay u leeyihiin dowlad madax-bannaan oo caasimaddeedu tahay Bariga Qudus.
Bayaanka ayaa lagu xusay qaraarrada 476 iyo 478 ee Golaha Ammaanka ee Qaramada Midoobay, kuwaas oo la ansixiyay sannadkii 1980-kii, isla markaana diiday tallaabooyinka lagu beddelayo xaaladda Qudus, kuna baaqay in dalalka safaaradaha ku leh magaalada ay kala baxaan.
Dalalka bayaanka soo saaray ayaa kala ah Soomaaliya, Urdun, Indonesia, Pakistan, Turkiga, Aljeeriya, Jabuuti, Sacuudi Carabiya, Suudaan, Suuriya, Cumaan, Falastiin, Qatar, Kuweyt, Lubnaan, Liibiya, Malaysia, Masar iyo Yemen.
Tallaabadan ayaa muujinaysa mowqifka wadajirka ah ee dalalkan ay ka qaateen xaaladda Qudus iyo xuquuqda shacabka Falastiin, xilli ay weli taagan tahay doodda caalamiga ah ee ku saabsan xaaladda sharci ee magaalada iyo dadaallada lagu doonayo in lagu gaaro xal siyaasadeed oo waara.
