Israa’iil ayaa sheegtay in diyaaradaheeda dagaalka ay duqeeyeen meel ku dheggan aqalka madaxtooyada Siiriya ee magaalada Dimishiq.
Ra’iisul Wasaare Benjamin Netanyahu uu wacad ku maray inuu difaaci doono dadka laga tirada badan yahay ee Druze ka dib maalmo ay socdeen rabshado diimeed oo ay dad badan ku dhinteen.
Netanyahu ayaa sheegay in duqeyntu ay farriin cad u tahay maamulka Suuriya in Israa’iil aysan ogolaan doonin wax kasta oo khatar ku ah bulshada Druze.Ma jirto wax jawaab ah oo ka soo baxay dowladda Suuriya.
Si kastaba ha ahaatee, waxa ay diiday faragelin shisheeye markii Israa’iil ay duqaymo ka geysatay koonfurta Dimishiq Arbacadii intii lagu jiray iska horimaad dhexmaray rag hubaysan oo Druze ah, ciidamada ammaanka iyo dagaalyahannada Islaamiyiinta Sunniga ah ee isbahaystay.
Hogaamiyaha ruuxiga ah ee Druze ee Suuriya, Sheikh Xikmat al-Hijri, ayaa cambaareeyay rabshadaha isagoo ku tilmaamay olole xasuuq aan sabab lahayn oo ka dhan ah beeshiisa, wuxuuna ku baaqay in ay soo farageliyaan ciidamada caalamiga ah si ay u ilaaliyaan nabadda.
Dowladda Suuriya ayaa sheegtay in ay ciidammo ammaanka ah geysay deegaannada Druze si ay ula dagaallamaan kooxaha sharci-darrada ah oo ay ku eedeysay inay huriyeen iska-horimaadyada.
Wasiirka arrimaha dibadda Asaad al-Shaibani ayaa sidoo kale ka digay in baaq kasta oo ku saabsan faragelin dibadeed.
Sida laga soo xigtay kooxda la socodka Suuriya ee Xuquuqda Aadanaha (SOHR), koox dabagal oo fadhigeedu yahay UK, ugu yaraan 102 qof ayaa lagu dilay toddobaadkan magaalada Ashrafyat Sahnaya, oo ah magaalo ku taal duleedka koonfureed ee Dimishiq, gaar ahaan agagaarka Druze ee Jaramana, iyo gobolka koonfureed ee Suweida, oo ay ku badan yihiin Druze.
Rabshadahan ayaa ka dhacay Jaramana habeenimadii Isniinta kadib markii muuqaal laga duubay nin aflagaadeynaya Nebi Muxamed NNKH lagu faafiyay baraha bulshada taasi oo ka caraysiisay Muslimiinta Sunniga ah. Waxaana lagu eedeeyay qof Druze ah.Balse wuu beeniyay qofka la sheegay inuu mas’uul ka ahaa faafinta.
Caqiidada Druze waa faraca Shiicada Islaamka oo leh aqoonsi iyo caqiidooyin u gaar ah. Ku dhawaad hal milyan oo taageere ayaa ku nool Suuriya, halkaas oo ay ka yihiin 3% dadweynaha, halka ay jiraan bulshooyin yar oo ku nool Lubnaan, Israa’iil iyo buuraha Golan ee la haysto.
Madaxweynaha ku meel gaarka ah ee Suuriya, Axmed al-Sharaa, ayaa ballan qaaday inuu ilaalin doono diimaha iyo qowmiyadaha laga tirada badan yahay ee waddankaas tan iyo markii uu ururkiisa Islaamiyiinta Sunniga ah uu hoggaaminayay ay afgambiyeen nidaamka Bashaar Al-Asad bishii December ka dib 13 sano oo dagaallo sokeeye ah.
