Waxaa maanta baaqday kulankii caadiga ahaa ee Golaha Shacabka Baarlamaanka Federaalka Soomaaliya, kadib markii ay xildhibaannada waayeen waddooyinkii ay u soo mari lahaayeen xarunta golaha, sida uu shaaciyay Habdhowraha Golaha Shacabka.
Sababta ugu weyn ee keentay baaqashada kulanka ayaa lagu sheegay in roobabkii xoogga lahaa ee xalay ka da’ay magaalada Muqdisho ay sabab u noqdeen biyo fariistay waddooyinka muhiimka ah ee isu xiraya xaafadaha iyo xarumaha dowliga ah, taasoo adkeysay isu socodka gaadiidka iyo dadka.
Habdhowraha Golaha Shacabka ayaa sheegay in kooram la’aan darteed aysan suurtagal noqon in la qabto kulanka, isagoo xusay in xaaladda waddooyinka ay si gaar ah u saameeyeen tirada xildhibaannada imaan kara xarunta Golaha.
Xildhibaanada qaar ayaa la sheegay inay saaka isku dayeen inay soo gaaraan xarunta, balse ay ku khasbanaadeen inay dib ugu laabtaan sababo la xiriira biyo fadhiya waddooyinka, burburka qaar kamid ah laamiyada, iyo gaadiid la’aan.
