Madaxweynihii hore ee Soomaaliya, Sheekh Shariif Sheekh Axmed, ayaa maanta shir jaraa’id ku qabtay magaalada Muqdisho, isaga oo si adag uga hadlay xaaladda amni, cadaadiska saxaafadda, iyo caburinta xorriyadda hadalka ee ka jirta caasimadda.
Sheekh Shariif ayaa si cad u cambaareeyay tallaabooyinka lagu bartilmaameedsanayo wariyeyaasha iyo warbaahinta madaxa-bannaan, isagoo sheegay in ficilladaasi ay yihiin kuwo lid ku ah dimuqraadiyadda iyo dowladnimada Soomaaliyeed.
“Xorriyadda hadalka iyo madaxbannaanida saxaafadda waa tiir muhiim ah oo dowlad kasta ay ku dhisan tahay. Marna la aqbali maayo in saxafiyiin la caburiyo ama la handado sababo siyaasadeed dartood,” ayuu yiri Sheekh Shariif.
Madaxweynihii hore wuxuu ugu baaqay dowladda in ay ilaaliso xuquuqda saxafiyiinta oo ay joojiso faragelinta tooska ah ee lagu hayo warbaahinta xorta ah, isagoo xusay in xorriyadda warbaahinta ay ka mid tahay waxyaabaha caalamka looga qiimeeyo dowlad wanaagga.
Sheekh Shariif ayaa madaxtooyada Soomaaliya ku eedeeyay in ay cuburin iyo caga jugleyn ku hayso warbaahinta madaxa banaan, islamarkaana waxaa uu xusayay in arrintaasi aan la aqbali karin, waxaa uuna dowladda ka dalbaday inuu joojiso damaca ay wato dowladda Soomaaliya.
Hadalkan ayaa imaanaya xilli warbaahinta gudaha ay wajahayaan cadaadis isa soo taraya oo lagu hayo qaar ka mid ah wariyeyaasha si gaar ah uga warama arrimaha siyaasadda iyo amniga ee dalka.
