Waxaa maanta magaalada Laascaanood si rasmi ah uga furmaya wejiga xiga ee Shirka Dhismaha Maamulka SSC-Khaatumo, iyadoo la soo xulay 301 ergo oo metelaya qeybaha kala duwan ee bulshada, kuwaasoo ay ka mid yihiin dhalinyaro, haween, cuqaal iyo waxgarad.
Ergadan la doortay ayaa door muhiim ah ka qaadan doonta dhismaha maamulka cusub, iyagoo qeyb ka noqon doona qaabeynta kuraasta maamulka SSC iyo dejinta qaab-dhismeedka guud ee maamulka.
Wararka naga soo gaaraya Laascaanood ayaa intaa ku daraya in Dowladda Federaalka Soomaaliya ay xiisaynayso in ergadan cusub ay si toos ah u doortaan maamulka cusub ee SSC, si loo helo maamul ku dhisan matalaad dhab ah iyo wada-tashi bulshada dhexdeeda ah.
Shirkan maanta ka furmaya magaalada Laascaanood ayaa wajahayo culeys siyaasadeed oo ugu imaanaya maamulka Puntland.
Wasiirka Caddaaladda Puntland, Maxamed Cabdiwahaab oo ka hadlay xiisadda siyaadadeed ee ka dhex aloosan Puntland iyo Khaatumo ayaa shaaciyay hal qodob oo uu ka abuurmay muranka labada dhinac.
Wasiir Maxamed Cabdiwahaab ayaa sheegay in hoggaanka khaatumo uu ka baxay go’aankii Puntland ku taageertay, oo ay ku dhawaaqeen isimada dhaqanka Laascaanood, ee ahaa in ay maamul gaar ah u samaysteen degaannadooda Sool iyo Cayn, haddase ay sheeganayaan degaannada Sanaag iyo Haylaan.
“Khaatumo waxaan leenahay, waad ka leexateen go’aankii isimadiina ee Puntland idinkula shaqaysay oo ahaa in aad rabitaankiina u madax-bannaan tihiin oo maamul gaar ah samaysateen, haddana waxaad sheeganaysaan Sanaag iyo Haylaan oo isimadoodu mowqif cad ka qaateen maamulkiina oo waad u ixtiraami la’ dihiin sidii la idin ixtiraamay” ayuu yiri Maxamed Cabdiwahaab.
