Iska hor-imaad sababay dhimasho iyo dhaawac ayaa maanta ka dhacay deegaanka Kala-baydh ee degmada Boosaaso, kadib markii laba maleeshiyo beeleed ay isku fara saareen.
Xogta hordhaca ah waxay tilmaamaysaa in iska hor-imaadku uu ka dhashay muran ku saabsan lahaanshaha iyo isticmaalka ceelbiyood cusub oo laga qodayo halkaas, taas oo ay labada dhinac si adag ugu kala aragti duwan yihiin.
Goob-joogayaal ayaa sheegay in xaalad kacsanaan ah ay weli ka taagan tahay deegaanka, iyadoo waddada isku xirta Boosaaso iyo magaalooyinka kale la xiray, dadka iyo gaadiidkana laga celinayo aagga Meermeerka ee magaalada Boosaaso.
Wararka kale waxay sheegayaan in labada ciidan beeleed ay weli isku horfadhiyaan meel aan ka fogayn deegaanka Kalabayr.
Maamulka gobolka Bari iyo saraakiisha amniga ayaa goobta u baxay, iyagoo ku howlan sidii loo joojin lahaa rabshadaha iyo in wada hadal lagu xalliyo khilaafka ceelka biyaha.
Waxaana la filayaa in saacadaha soo socda ay soo baxaan faahfaahin dheeraad ah oo ku saabsan khasaaraha rasmiga ah iyo tallaabooyinka la qaadayo.
