Diyaaraddii ugu horreysay oo ay saarnaayeen masuuliyiin iyo shacab isugu jira ayaa maanta si rasmi ah uga soo degtay Garoonka cusub ee diyaaradaha degmada Buurhakaba, oo ku yaalla gobolka Bay ee maamulka Koonfur Galbeed Soomaaliya.
Degmada Buurhakaba ee Gobolka Bay ayaa yeelatay garoon diyaaradeed oo cusub, waxaana maanta markii ugu horreysay ka degtay diyaarad rakaab ah, kaddib markii dhawaan la soo gabagabeeyey dhismaha garoonkan.
Duulimaadyada diyaaradaha ee degmada taariikhiga ah ayaa hadda noqonaya kuwo joogto ah, iyadoo bulshada degmada ay baahi weyn u qabeen, maadaama uu garoonku fududeynayo isu socodka iyo adeegyada muhiimka ah.
Garoonkan cusub ayaa noqonaya mid fure u ah isku xirka degmada Buurhakaba iyo guud ahaan gobolka Bay, isaga oo fududeyn doona socdaalka dadka iyo gaadiidka hawada, isla markaana horseedi doona koboc dhaqaale iyo adeegyo bulsho oo hor leh.
Degmada Buurhakaba oo ah tan labaad ee ugu weyn gobolka Bay, ayaa 180 km u jirta magaalada Muqdisho, caasimadda dalka, halka ay 60 km u jirto magaalada Baydhabo oo xarun u ah gobolka Bay.
