Ugu yaraan 69 qof ayaa ku dhintay tiro kalena waa la la’yahay ka dib markii ay doon ku degtay xeebaha dalka Mauritania, sida ay sheegeen ilaalada xeebaha dalka ku yaalla waqooyi-galbeed ee Afrika.
17 qof ayaa la soo badbaadiyay, waxaana wali socda baadigoobka. Wararka ayaa sheegaya in dadka doonida la socday ay u badnaayeen Senegal iyo Gambia, kuwaas oo doonayay inay gaaraan jasiiradda Canary ee dalka Spain.
Sida laga soo xigtay dad ka badbaaday shilkaas, doonta ayaa ka tagtay Gambia lix maalmood ka hor shilkii ku yimid Talaadadii, iyadoo ay la socdeen ku dhawaad ​​160 qof oo u badan dad u dhashay Gambia iyo Senegal.
Socdaalka halista ah ee ay ku marayeen badweynta Atlaantigga ayaa noqday marin ay si isa soo taraysa u maraan tahriibayaasha Afrikaanka ah ee isku dayaya in ay gaaraan Yurub.
Ku dhawaad ​​47,000 oo qof ayaa gaaray jasiiradaha Canary sanadkii hore, ururka aan dawliga ahayn ee Isbaanishka ee Caminando Fronteras ayaa ku qiyaasay in in ka badan 9,000 oo muhaajiriin ah ay dhinteen iyagoo isku dayaya safar ay ku tagaan Spain.
