Wafdi ka kooban 16 xubnood oo ka tirsan Ciidanka Qaranka Masar ayaa shalay soo gaaray magaalada Muqdisho, iyagoo u yimid hawlgal qiimeyn iyo kuur-galid ah ka hor inta aanay Ciidanka Masar si rasmi ah u iman Soomaaliya kuna soo biirin Hawlgalka AUSSOM ee Midowga Afrika.
Wafdiga, oo uu hoggaaminayay Sareeye Guuto Islam Radwan, waxaa si rasmi ah ugu soo dhaweeyay saraakiil ka tirsan AUSSOM iyo Ciidanka Qaranka Soomaaliyeed.
Intaas ka dib, waxay kulan la yeesheen madaxda AUSSOM oo uu hoggaaminayay Wakiilka Gaarka ah ee Midowga Afrika, ahna Madaxa AUSSOM, Danjire El Hadji Ibrahima Diene, iyagoo ka qeybgalay xog-warran amni oo ka dhacay Taliska Guud ee Ciidanka AUSSOM.
Inta ay ku sugan yihiin Soomaaliya, wafdiga ayaa kormeer ku tagi doona xarumo muhiim ah oo ku yaalla Muqdisho iyo goobaha hawlgalka, kuwaas oo loo qorsheeyay in ay noqdaan saldhigyo dejin iyo saadka ciidanka Masar ee imanaya Soomaaliya.
