Madasha Mucaaradka ee Samatabixinta Soomaaliyeed (M.S.S) ayaa war-saxaafadeed ay soo saartay ku cambaareysay xarig iyo afduub ay ku tilmaantay mid sharci-darro ah oo lagu hayo saddex haween Soomaali ah, kuwaas oo ay sheegeen in muddo 10 cisho ah ku xiran yihiin saldhigga degmada Wartanabadda ee magaalada Muqdisho.
Haweenkaas ayaa lagu kala magacaabay:
1. Marwo Samsam Cumar Cali
2. Marwo Xabiiba Cabdi Cali
3. Marwo Kaaxo Xasan Jimcaale
Madasha ayaa sheegtay in haweenkan la xiray kadib markii ay diideen barakicin iyo dhul-boob ka socday deegaanka Suuqa Siinaay, halkaas oo ay dowladda iyo kooxo hubeysan la sheegay in ay doonayeen in si khasab ah dhul looga raro dad shacab ah.
Warsaxaafadeedka ay soo saartay Madasha ayaa lagu sheegay in dowladda ay qorsheyneyso in muddada xabsigooda lagu kordhiyo 45 cisho oo kale, taas oo ay ku tilmaameen “awood sheegasho iyo dulmi ka dhan ah xuquuqda muwaadiniinta Soomaaliyeed”.
Madasha Samatabixinta ayaa ku baaqday in haweenkan si degdeg ah oo aan shuruud lahayn loo sii daayo, iyadoo xusuusisay hay’adaha amniga iyo garsoorka in ay ku xiran yihiin waajibaad dastuuriga ah oo ay ku ilaaliyaan xuquuqda shacabka, halkii ay u adeegayaan danaha gaarka ah ee madaxda dowladda.
“Waxaa nasiib-darro weyn ah in hay’adihii nabad-gelyada iyo garsoorka ee looga baahnaa in ay muwaadiniinta u caddaalad falaan ay maanta u adeegayaan danaha shakhsiyaad garab ka helaya madaxda dowladda, gaar ahaan Madaxtooyada,” ayaa lagu yiri qoraalka Madasha.
Madasha Samatabixinta Soomaaliyeed waxay ugu baaqday bulshada rayidka, ururrada xuquuqda aadanaha iyo beesha caalamka in ay si dhow ula socdaan xaaladda haweenkan, isla markaana cadaadis ku saaraan dowladda si loo ilaaliyo xuquuqda muwaadiniinta iyo dastuurka dalka.
