Maamulka Puntland ayaa ku dhawaaqday in howlgalada ciidamadeedu ka wadaan buuraha Calmiskaad ee Gobolka Bari lagu dilay ku dhowaad 700 dagaalyahan oo ajaanib ah tan iyo dabayaaqadii sanadkii hore, halka Soomaalida ku dhimatay ay ahaayeen shan qof oo keliya.
Xogtan waxaa shaaca ka qaaday Maxamed Cabdiraxmaan Dhabancad, la-taliyaha Madaxweynaha Puntland ee arrimaha siyaasadda, oo wareysi siiyay telefishinka caalamiga ah ee Sky News. Dhabancad ayaa weriyaha Sky News, Alex Crawford, tusay baasaboorrada dagaalyahanno ka kala yimid in ka badan 20 waddan oo ku biiray kooxda Daacish.
Dagaalameyaasha ayaa ka yimid qaar ka tirsan Yurub, Ameerika, Afrika iyo Aasiya. Qaar ka mid ah waxay dalka ku soo galeen qaab sharci darro ah ama si ay uga dhiganayaan qaxooti, halka kuwo kale ay xeebaha Yemen kaga soo gudbeen doomaha tahriibka.
Puntland ayaa sheegtay in hadda 70% dagaalyahannadii Daacish ee ku sugnaa buuraha Calmiskaad la ciribtiray, tirada harsanna ay aad u kooban tahay.
