Ugu yaraan toddobo askari boolis ah ayaa si xun ugu dhaawacmay qarax lala eegtay gaari ay la socdeen, kaasoo ka dhacay wadada u dhaxeysa Aresa iyo Khalalia ee degmada Mandera East, xilli ay marayeen deegaanka Gadudia-Laga, saqdii dhexe ee 1-dii habeenimo ee July 8.
Gaariga ayaa ka ambabaxay deegaanka Bambo, isagoo kusii jeeday magaalada Mandera, waxaana uu ku qarxay miino nooca dhulka lagu aaso (IED).
Qaraxa ayaa sababay dhaawac culus oo gaaray askarta, iyadoo gaarigii ay la socdeen uu si daran u burburay.
Askarta dhaawacantay ayaa loo qaaday isbitaal deegaanka ah si gurmad caafimaad loo siiyo.
Saraakiisha ammaanka ayaa sheegay in howlgal ballaaran oo ay fuliyeen ciidamada sida wadajirka ah loogu diray halka qaraxu ka dhacay, si loo baacsado maleeshiyaadka falkan ka dambeeyay.
Afhayeenka Booliiska Qaranka ee Kenya, Michael Muchiri, ayaa sheegay in dadaallada lagula tacaalayo khatarta Al-Shabaab ay socdaan, inkasta oo weerarrada mararka qaar sii socdaan.
Dhanka kale, maleeshiyaadka Al-shabaab ayaa waxaa ay weerar ka geysteen deegaanka Qarsa ee magaalada Wajeer , halkaas oo Taliyaha deegaanka (Senior Chief) Adow Ali iyo adeerkiis Noor Gathuf lagu dilay, sida uu qoray wareyska The Star.
Maleeshiyaadka ayaa waxaa ay weerareen ku qaadeen guriga Taliyaha, Goobjoogayaal ayaa sheegay in dableydu ay ugu yeereen in uu bannaanka usoo baxo, markii uu diidayna ay bam ku tuureen guriga, dabadeedna ay kasoo jiideen dibadda oo ay saddex xabo ku dhufteen. Kadibna waxay u gudbeen guriga adeerkiis oo ay halkaasna ku dileen.
Xaaladda Mandera iyo Wajir ayaa sare u kacday, iyadoo dadka deegaanka ay muujinayaan walaac ballaaran oo ku saabsan amniga guud ee gobolka.
