Booliiska Guriceel oo mamnuucay baabuurta leh muraayadaha madoow
Taliska Booliiska degmada Guriceel ayaa maanta soo saaray amar cusub oo lagu mamnuucayo in gudaha magaalada lagu wado baabuur kasta oo leh muraayado madoow (beensal), kuwaas oo carqaladeeya amniga iyo daba-galka dambiyada.
Ujeedada amarkan ayaa ah adkeynta amniga guud, ka hortagga falalka amniga lidiga ku ah, iyo in la helo muuqaal cad oo sahla howlaha baarista iyo ilaalinta shacabka.
“Baabuur kasta oo lagu qabto isaga oo wata muraayado madoow oo aan sharciyeysneyn waxaa laga qaadi doonaa tallaabo sharci ah, iyadoo la raacayo xeerarka amniga ee degmada Guriceel.” Ayaa lagu yiri qoraalka.
Taliska Booliiska Guriceel wuxuu shacabka iyo darawallada ku boorinayaa in ay u hoggaansamaan amarkan, si loo xaqiijiyo wada-shaqeyn, nabadgalyo iyo kala dambeyn.
“Amniga waa wada-jir, ilaalintiisuna waa masuuliyad wadareed,” ayuu yiri Taliska.
Shacabka magaalada ayaa lagu wargeliyey in la raaco amarkan si looga hortago waxyeelo kasta oo ka dhalan karta adeegsiga muraayadaha madoow ee aan sharciga waafaqsanayn.
Talaabadan ayaa ka dambeysay kadib markii xalay ganacsade caan ka ahaa degmada Guriceel halkaasi lagu dilay.
