Booliiska Soomaaliya ayaa beeniyay wararka sheegaya in qof shacab ah lagu dilay afaafka hore ee Saldhigga Degmada Waaberi ee Gobolka Banaadir.
Qoraal ka soo baxay Booliiska ayaa lagu sheegay in Askarta Saldhigga Waaberi ay soo xireen eedeysane lagu magacaabo Farxaan Ibraahim Abshir, kaas oo loo haystay eedeymo la xiriira falal sharci-darro ah.
Booliiska ayaa sheegay in xilli eedeysanaha la hayay uu isku dayay inuu qoriga ka qabsado mid ka mid ah Askarta Saldhigga, kadibna uu dhacay isku dhac sababay in xabbad si kama’ ah uga fakatay qoriga, taas oo garabka kaga dhacday eedeysanaha.
Sida uu Booliisku sheegay, Farxaan Ibraahim Abshir ayaa soo gaaray dhaawac fudud, waxaana loo qaaday isbitaal si loo siiyo daryeel caafimaad.
Booliiska Soomaaliya ayaa sidoo kale caddeeyay in baaritaan lagu hayo dhacdada iyo sida ay xabbaddu u dhacday, iyadoo lagu adkeeyay in aysan jirin mayd laga soo saaray Saldhigga Degmada Waaberi, sida lagu faafiyay wararka qaarkood.
Booliisku waxay sheegeen in baaritaanka dhacdada uu socdo, islamarkaana wixii kasoo kordha ay bulshada la wadaagi doonaan.
