Ciidanka Xoogga Dalka ee Guutada 7aad iyo Taliska Booliska Degmada ayaa howlgal qorsheysan ka fuliyay tuulooyinka Guudaale, Riiglow iyo Yaaq-biriweyne, halkaas oo ay ku sugnaayeen maleeshiyaad jidgooyo u dhigtay waddooyinka ay isticmaalaan gaadiidka xamuulka qaada.
Inta lagu guda jiray howlgalka, ciidanku waxay kusoo qabqabteen maleeshiyaad wadada ku hakiyay baabuurta xamuulka.
Wararka ayaa sheegaya in maleeshiyadu ay rasaas ku fureen goob ay jidgooyo uga heysteen gaadiid xamuul ah, xilli ay kusoo bexeen ciidamada Xoogga Dalka iyo kuwa Booliska.
Iska caabin kooban oo dhacay kadib, ciidamada ayaa dilay saddex ka mid ah maleeshiyada, halka afar kalena nolol lagu qabtay. Maleeshiyaadka la qabtay ayaa lagu wadaa in loo gudbiyo hay’adaha amniga si maxkamad loo horgeeyo, maadaama hore loogu amray ciidanka in ay soo qabtaan cid kasta oo bulshada caqabad ku noqota.
Taliyaha howlgalka hogaaminayay, Taliye Axmed Gashaan, ayaa sheegay in ay gacanta ku dhigeen “2 dhaawac ah, laba fayow iyo hubkoodii, saddexna ay goobta ku naf waayeen.” Isagoo uga digay kuwa kale ee weli dhuumaleysanaya, ayuu yiri:
“Kuwa dhuumaleysanaya waxaan leenahay si sharaf leh isku soo dhiiba.”
Duleedka deegaanka Yaaqbariweyne ayaa waxaa ka socda howlgal culus oo lagu baadi goobayo maleeshiyaad ay xukun dil ah ku riday maxkamada ciidamada qalabka sida.
