Taliyaha Ciidamada Dhulka ee Ethiopia ayaa farriin u diray ciidamo cusub oo Itoobiyaan ah oo loo soo dirayo Soomaaliya si ay uga qeyb qaataan howlgalka AUSSOM, isagoo ku booriyay inay ka fogaadaan arrimaha siyaasadda isla markaana diiradda saaraan waajibaadkooda shaqo.
Taliyaha ayaa sheegay in ciidamadaasi ay beddeli doonaan cutubyo hore uga tirsanaa howlgalka AUSSOM kuwaas oo waqtigoodii shaqo uu dhammaaday.
Wuxuu sidoo kale ciidanka kula dardaarmay inay ilaaliyaan sumcadda dalkooda, maadaama ay yihiin “safiiro matalaya qarankooda.”
Ciidamo cusub oo Itoobiyaan ah ayaa la filayaa in dhawaan loo soo daabulo gudaha Somalia, si ay uga qeyb qaataan howlaha nabad ilaalinta iyo xasillinta dalka.
Falanqeeyayaal siyaasadeed ayaa aaminsan in siyaasadda arrimaha dibadda ee Itoobiya ee ku aaddan Soomaaliya ay laga yaabo inay wax yar isbeddesho, iyadoo ay jirto dib-u-habeyn ku socota howlgalka Midowga Afrika.
Itoobiya ayaa ka mid ah dalalka ugu waaweyn ee ciidamo ku biiriyay howlgalka nabad ilaalinta Midowga Afrika ee Soomaaliya muddo ku dhow 20 sano.
Dalalka kale ee ciidamada ku leh howlgalka AUSSOM waxaa ka mid ah Kenya, Djibouti, Uganda, Burundi iyo Egypt oo dhowaan ku biirtay howlgalka.
