Madaxweynaha Soomaaliya, Xasan Sheekh Maxamuud, ayaa la filayaa inuu ka qeyb galo shir-madaxeed muhiim ah oo u dhexeeya dalalka Afrika iyo Faransiiska, kaasoo lagu qabanayo magaalada Nairobi inta u dhaxeysa 10-ka ilaa 12-ka bisha May 2026.
Shirkan heer caalami ah ayaa lagu qaban doonaa xarumo waaweyn oo ku yaalla Nairobi, kuwaas oo ay ka mid yihiin Jaamacadda Nairobi iyo Xarunta Shirarka Caalamiga ah ee Kenyatta, halkaas oo la filayo inay isugu yimaadaan madax, diblomaasiyiin, iyo wakiillo ka kala socda dalal badan oo Afrika iyo Yurub ah.
Waxaa sidoo kale la qorsheeyay kulan hordhac ah oo furitaan u noqon doona shirka, kaasoo dhici doona 10-ka May.
Ajandaha kulankan ayaa diiradda lagu saari doonaa xoojinta xiriirka iyo iskaashiga u dhexeeya Afrika iyo Faransiiska, gaar ahaan dhinacyada dhaqaalaha, maalgashiga, amniga, iyo siyaasadda.
Waxaa la filayaa in si gaar ah looga hadlo horumarinta ganacsiga, kobcinta dhaqaalaha dalalka Afrika, iyo sidii loo abuuri lahaa fursado shaqo oo cusub oo ay ka faa’iideystaan dhalinyarada.
Sidoo kale, shirka ayaa muhiim u ah Soomaaliya, maadaama uu Madaxweynaha fursad u heli doono inuu la kulmo madaxda kale ee ka qeyb galeysa, isla markaana uu ka doodo arrimaha mudnaanta u leh dalka sida amniga, la dagaallanka argagixisada, dib-u-dhiska dowladnimada, iyo soo jiidashada maalgashi caalami ah.
Dhanka kale, Madaxweynaha Soomaaliya ayaa isla waqtigaas casuumad u fidiyay xubnaha Golaha Mustaqbalka Soomaaliya, oo ay ku jiraan maamul goboleedyada Puntland iyo Jubbaland, si ay uga qeyb galaan shir muhiim ah oo gudaha ah.
Kulankan gudaha ayaa la filayaa inuu diiradda saaro xaaladda siyaasadeed ee dalka, wadatashiga arrimaha doorashooyinka, iyo xoojinta wada shaqeynta dowladda federaalka iyo dowlad goboleedyada.
Dhanka kale madaxweynaha Soomaaliya Xasan Sheekh Maxamuud ayaa la filayaa inuu ka qeyb galo xaflada Caleema saarka ee Madaxweynaha Jabuuti Ismaaciil Cumar Geelle oo dhawaan markale dib loo doortay, waxaana munaasabadda Caleema saarka ay dhici doontaa 9 Bishan.
Safarka madaxweyne Xasan Sheekh Maxamuud ee Jabuuti ayaa qaadan doono hal maalin oo keliya.
