Ciidanka Israa’iil ayaa si rasmi ah u xaqiijiyay geerida mid ka mid ah askartooda oo lagu dilay dagaal ka dhacay meel u dhow xadka u dhexeeya Israa’iil iyo dalka Lebanon.
War-saxaafadeed kasoo baxay militariga Israa’iil ayaa lagu sheegay in askariga dhintay uu ahaa Alexander Golovaniov oo 47 jir ahaa, kana tirsanaa ciidamada militariga Israa’iil.
Sida lagu sheegay bayaanka, Alexander wuxuu ahaa darawalka gaari ciidan, waxaana la dilay maalintii Axadda xilli ay socdeen dagaallo ka dhacay deegaanka xadka ah.
Militariga Israa’iil ma aysan bixin faahfaahin dheeraad ah oo ku saabsan sida uu weerarku u dhacay ama kooxda ka dambeysay dilka askarigaasi, balse xiisadda ka taagan xadka Lubnaan iyo Israa’iil ayaa sii xoogeysaneysay bilihii u dambeeyay.
Dagaallada iyo iska horimaadyada kasoo cusboonaaday deegaannada xadka ayaa sare u qaaday walaaca laga qabo in colaadda gobolka ay sii fido, iyadoo ciidamada Israa’iil iyo xoogagga hubeysan ee ka howlgala koonfurta Lubnaan ay marar badan is weydaarsadeen weerarro.
