Dagaal xooggan oo ka dhacay Baydhabo

Dagaal culus oo la isku adeegsaday hubka noocyadiisa kala duwan ayaa xalay ka dhacay bartamaha magaalada Baydhabo, xarunta KMG ah ee Dowlad Goboleedka Koofur Galbeed iyo xarunta gobolka Baay.
Iska horimaadka ayaa si lama filaan ah u billowday abaarihii 1:30 habeenimo, wuxuuna socday muddo, iyadoo jugta rasaasta iyo madaafiicda laga maqlayay inta badan xaafadaha magaalada.
Dagaalka ayaa markii dambe ku fiday Jidka 30-ka oo ka mid ah waddooyinka ugu muhiimsan ee Baydhabo.
Ilaa iyo hadda, ma jiro war rasmi ah oo ka soo baxay maamulka Koonfur Galbeed iyo saraakiisha amniga oo ku saabsan khasaaraha ka dhashay dagaalka, waxaana jira walaac laga qabo in rasaas habow ah ay waxyeello gaarsiisay dadka rayidka ah.
Sidoo kale, weli lama xaqiijin dhinacyadii rasmiga ahaa ee ku lug lahaa dagaalka, maadaama xaaladda amni iyo siyaasadeed ee gobolka Baay ay tahay mid cakiran, isla markaana ay jiraan dhinacyo kala duwan oo hubeysan oo ka howlgala deegaannada gobolka.
Wararka ku saabsan dagaalkan ayaa weli soo baxaya, waxaana la filayaa in maamulka iyo hay’adaha amniga ay faahfaahin ka bixiyaan marka baaritaannada hordhaca ah la soo gabagabeeyo.