Warsaxaafadeed kasoo baxay wasaaradda Gaashaandhigga Soomaaliya ayaa lagu sheegay in howlgal ka dhacay duleedka Baydhabo lagu dilay dagaalamayaal ka tirsan Al-shabaab.
Howlgalkan oo ay duqeymo cirka ah qeyb ka ahaayeen ayaa daba socday weerarkii shalay lagu qaaday ciidanka dowladda, kaasi oo lagu dilay saraakiil ciidan kadib dagaal qaraar oo ka dhacay duleedka magaalada Baydhabo.
Qoraalka ayaa lagu sheegay in 50 xubnood lagu khaarijiyay duqeynta, halka sidoo kale la burburiyay gaadiid dagaal oo ay lahaayeen maleeshiyaadka Al-Shabaab.
Dowladda Soomaaliya ayaa sheegtay in weerarkii shalay ay ku lug lahaayeen maleeshiyaad Taabacsanaa Madaxweynihii hore ee Koofur Galbeed Cabdi casiis Lafta gareen, kuwaasi oo ay ku eedeysay inay ku milmeen kooxda Al-Shabaab.
“Sheegashada weerarka Khawaarijta ayaa muujinaysa in maleeshiyaadka ay noqdeen garab u adeegaya argagixisada, islamarkaana khatar ku ah amniga iyo xasiloonida deegaanadda Koofur Galbeed”ayaa lagu yiri warka.
Sidoo kale wasaaarada ayaa sheegtay inaysan u dulqaadan doonaan cidkasta oo hub ama maleeshiyaad u adeegsato Dano siyaasadeed, islamarkaana tallaabo adag ay ka qaadi doonto.
“Dowladdu waxay xaqiijineysaa in aysan marnaba u dulqaadan doonin cid kasta oo hub ama maleeshiyaad u adeegsata dano siyaasadeed, carqaladeynta amniga iyo in cid kasta oo gacan siisa Khawaarijta ama u noqota weji ay ku dhuuntaan laga qaadi doonaa tallaabo sharciga waafaqsan.”ayaa la sii raaciyay warka.
