Magaalada Muqdisho waxaa maanta lagu wadaa inuu soo gaaro hoggaamiyaha Maamulka SSC-Khaatumo, Mudane Cabdiqaadir Axmed Aw-Cali (Firdhiye), kaasi oo heysta casuumaad rasmi ah oo ku saabsan ka-qeybgalka Shirka Madasha Wadatashiga Qaran.
Shirka Madasha oo si rasmi ah u furmaya maalmaha 1-da ilaa 2-da bisha soo socota, ayaa la filayaa inay ka qeybgalaan dhammaan madaxda maamul-goboleedyada dalka, marka laga reebo Madaxweynaha Puntland Siciid Cabdullaahi Deni iyo Madaxweynaha Jubbaland Axmed Maxamed Islaam (Axmed Madoobe).
Puntland ayaa ka biyo-diiday ka-qeybgalka shirkan iyadoo ku xirtay shuruud ah in laga laabto isbeddelkii lagu sameeyay afar cutub oo ka mid ah dastuurka Kumeelgaarka ah, halka Jubbaland aan lagu casuumin gabi ahaanba madasha.
Ka-qeybgalka SSC-Khaatumo ee shirkan ayaa ah mid taariikhi ah, maadaama ay markii ugu horraysay fursad u helayaan inay fadhiistaan miiska siyaasadda heer qaran ee Soomaaliya, isla markaana ay si toos ah uga qeyb qaataan go’aanada masiiriga ah ee dalka.
Shirka Madasha kadib, waxaa Muqdisho ka bilaaban doona shir ballaaran oo diiradda lagu saari doono xaaladda siyaasadeed ee dalka iyo dagaalka ka dhanka ah kooxda Al-Shabaab. Shirkan labaad waxaa lagu casuumay saamilayda siyaasadeed ee dalka iyo wakiillada ururrada bulshada rayidka ah, waxaana lagu falanqeyn doonaa sidii loo mideyn lahaa dadaallada amni iyo kuwa siyaasadeed.
