Xildhibaan Ilhaan Cumar oo laga soo doorto gobolka Minnesota ee dalka Mareykanka ayaa sheegtay in aysan ka qoomameynin taageeridda Xeerka MEALS intii lagu jiray cudurka faafa ee COVID-19, inkastoo barnaamijkaasi uu xiriir la yeeshay khiyaano la sheegay in lagu sameeyay $250 milyan oo ka dhacday gobolka Minnesota taasoo loo yaqaan ‘Feeding Our Future’. Ama Quudi Mustaqbalkeenna.
“Ma ka qoomamaysaa riixitaankii aad riixday biilkaas, Xeerka MEALS? Ma u maleyneysaa inuu horseeday khiyaanada?” Nicholas Ballasy oo u shaqeeya Fox News Digital ayaa weydiiyay Ilhaan iyadoo joogta Capitol Hill, sida ay qortay warbaahinta Fox News.
“Gebi ahaanba maya, wuxuu gacan ka geystay quudinta carruurta,” ayay tiri Ilhaan.
Ilhaan ayaa soo bandhigtay Xeerka MEALS 11-kii Maarso, 2020, si wax looga beddelo barnaamijyada cuntada iyo nafaqada ee Waaxda Beeraha si loogu oggolaado ka-dhaafidda shuruudaha qaarkood ee barnaamijyada cuntada dugsiyada, oo ay ku jiraan kuwii kordhiyay kharashka federaalka intii lagu jiray xirnaanshaha dugsiyada sababo la xiriiray cudurka faafa.
Minnesota ayaa wajahday baaritaan la xiriira maamul xumo la sheegay in lagu sameeyay lacagaha federaalka ah ee lagu helay ka-dhaafitaannadan, oo ay ku jiraan qaybinta lacagta barnaamijka ‘Feeding Our Future’, kaasoo mas’uuliyiintu ay aaminsan yihiin inuu yahay mashruucii khiyaano ee ugu weynaa taariikhda cudurka faafa.”
