Ciidamada Hay’adda Sirdoonka iyo Nabadsugida Jubaland (JISA), Ciidanka Gaarka ah ee Danab (Danab Special Forces), iyo Saaxiibada Caalamka ayaa howlgal qorshaysan oo burburin ah ka fuliyay deegaano dhowr ah oo hoostaga Degmada Jamaame ee Gobolka Jubada Hoose.
Howlgalladan ayaa si gaar ah uga dhacay deegaanada Qoraxey, Siirey, Farbulaay, Turdho, Yiirey, Janaale Jaay, iyo Maleyley, halkaas oo lagu burburiyay godad iyo xarumo ay ku dhuumaaleysanayeen dagaalyahanno ka tirsan Al-Shabaab.
Inta lagu guda jiray howlgalka, waxaa la xaqiijiyay in 18 dagaalyahan oo ka tirsanaa Al-Shabaab lagu dilay, halka 32 kale lagu dhaawacay intii ay socdeen howlgaladan oo cirka iyo dhulka isugu jiray.
Ciidamada Dowladda Jubaland qeybahooda kala duwan iyo Ciidanka Xoogga Dalka Soomaaliyeed (CXD) ayaa adkeeyay go’aankooda ku aaddan dagaalka ka dhanka ah Al-Shabaab, iyagoo ku baaqay in la sii dardargeliyo howlgallada lagu sugayo amniga, xasilloonida, iyo nolol nabdoon oo shacabka Soomaaliyeed ay ku naaloodaan.
