Ra’iisul Wasaarihii hore ee Soomaaliya, Xasan Cali Kheyre, ayaa sheegay in hubka iyo rasaasta ay dowladda Madaxweyne Xasan Sheekh Maxamuud ka qaaday Muqdisho una dirtay magaalada Gaalkacyo, kuwaas oo sida uu sheegay sababay iska horimaadyo hubeysan iyo dhaawacyo, ay caddeyn u yihiin in dowladdu aysan mudnaan siinayn mideynta dalka iyo dagaalka ka dhanka ah Al-Shabaab.
Qoraal uu soo saaray, Xasan Cali Kheyre ayaa ku eedeeyay Madaxweyne Xasan Sheekh inuu halkii uu xoogga saari lahaa la dagaallanka argagixisada, uu dalka u jiheynayo colaad sokeeye.
Kheyre wuxuu xusay in toddobaadkii hore Beesha Caalamka ay magaalada Kampala ku yeesheen shir looga hadlay sidii Soomaaliya u gaari lahayd xasillooni siyaasadeed oo lagu dhisi karo isku duubni qaran si loola dagaallamo Al-Shabaab, balse wuxuu sheegay in tallaabooyinka hadda socda ay ka hor imaanayaan ujeeddadaas.
Sidoo kale, Ra’iisul Wasaarihii hore ayaa sheegay in shacabka Galmudug iyo Puntland ay muddo dheer ku wada noolaayeen nabad iyo derisnimo, hase yeeshee tallaabooyinka uu ku eedeeyay Madaxweynaha ay si toos ah khatar ugu yihiin nabadda iyo xasilloonida ka jirta gobolka.
Qoraalkan ayaa imanaya xilli ay sii kordhayaan xiisadaha amni iyo siyaasadeed ee magaalada Gaalkacyo, iyadoo dagaallo ay ka dhaceen qaybo ka mid ah magaalada.
Ilaa iyo hadda, Madaxtooyada Soomaaliya si rasmi ah ugama aysan jawaabin eedeymaha uu soo jeediyay Ra’iisul Wasaarihii hore ee Soomaaliya, Xasan Cali Kheyre.
