Kulamo siyaasadeed ayaa ka bilowday magaalada Laascaanood ee Gobolka Sool, kaasi oo ay wadaan siyaasiyiinta musharixiinta madaxtinimada ee maamulka Waqooyi Bari ee Soomaaliya.
Hoggaamiyaha SSC-Khaatumo Cabdiqaadir Axmed Firdhiye iyo siyaasiga caanka ah Cabdirashiid Abwaan ayaa xalay kulan gaar ah kula yeeshay xildhibaannada cusub ee maamulka Waqooyi-Bari Soomaaliya, kuwaas oo dhowaan lagu dhaariyey magaalada Laascaanood.
Kulankan oo lagu tilmaamay mid muhiim ah ayaa loo arkaa bilowga ololaha siyaasadeed ee madaxtinimada maamulka cusub, iyadoo labada musharrax ay si cad u muujinayaan damacooda hoggaamineed.
Maalmaha soo socda, Laascaanood waxaa ka billowday loolan siyaasadeed iyo kala jiidasho xooggan oo u dhexeeya musharraxiinta u taagan Guddoonka Baarlamaanka iyo xilka Madaxweynaha Waqooyi-Bari Soomaaliya, taas oo xiisaha siyaasadeed ee magaalada sii kordhisay.
Hoggaamiye Cabdiqaadir Firdhiye oo warbaahinta kula hadlay Laascaanood ayaa sheegay in si rasmi ah uu furmay loolanka siyaasadeed ee maamulka cusub, isagoo xildhibaannada ugu baaqay inay ka shaqeeyaan midnimada iyo horumarka bulshada gobolka.
