Diyaarad rakaab ah iyo mid kale oo helikobter ah ayaa ku dhacay meel u dhow garoonka qaranka Reagan ee duleedka Magaalada Washington, DC,sida ay ka dhawaajiyeen Aqalka Cad iyo Hey’adda duulimaadyada ee Mareykanka.
Labadaan diyaaradood oo lagu sheegay jet iyo Black Hawk ayaa ku dhacay wabiga Potomac ee duleedka Magaalada Washington,kadib markii ay isku jiireen hawada.
Diyaaradda rakaabka ah ee ay leedahay shirkadda American Airlines ayaa lagu waramay in ay sidday 60 ruux iyo 4 shaqaale ah,halka diyaaradda kale oo aheyd kuwa qumaatiga u kaca ay sidday 3 sarkaal oo ciidanka ah.
ma jiro war rasmi ah oo ku saabsan khasaaraha ka dhashay labadaasi diyaarad ee isku dhacay.
Diyaaradda rakaabka ah ayaa ka soo duushay magaalada Wichita ee gobolka Kansas ee dalka Mareykanka, waxayna ku soo socotay Magaalada Washington ee dalka Mareykanka.
Booliska ayaa sheegay in hay’ado badan ay ka qeyb qaadanayaan baadigoobka iyo samata bixinta haddii ay jiraan dad ka badbaaday shilalkaasi,waxaana si ku meel gaar ah loo joojiyay dhammaan duullimaadyada baxaya iyo kuwa soo dagaya.
Madaxweynaha Mareykanka Donald Trump ayaa sheegay in lagu wargeliyay shilkaasi , wuxuuna ka mahadceliyay gurmadka degdegga ah iyo shaqada cajiibka ah ee halkaasi ka socota.
