Madaxweynaha Soomaaliya Xasan Sheekh Maxamuud ayaa la filayaa inuu ka qeyb galo shir ka dhacaya Magaalada Baqdaad ee dalka Ciraaq, kadib casuumaad rasmi ah oo ka timid madaxweynaha Ciraaq, taasi oo loo soo dhiibay Wasiirka Arrimaha Gudaha ee dalka Ciraaq oo maalmo ka hor booqasho rasmi ah ku yimid magaalada Muqdisho,Islamarkaana la kulmay Madaxweynaha Soomaaliya.
Intii uu kulanku socday, Wasiirka Ciraaq wuxuu Madaxweynaha Soomaaliya u gudbiyay fariin casuumaad rasmi ah oo uu ka siday Madaxweynaha Ciraaq, taasoo ku saabsan ka qaybgalka shir madaxeedka waddamada Carabta oo la qorsheeyay inuu ka furmo magaalada Baqdaad 17-ka May 2025.
Fariintan casuumaada ayaa muujinaysa muhiimadda xiriirka diblomaasiyadeed iyo iskaashi ee u dhexeeya Soomaaliya iyo waddamada Carabta, iyada oo la filayo in shirka Baqdaad diiradda lagu saaro arrimaha amniga, dhaqaalaha, iyo horumarinta xiriirka dalalka xubnaha ka ah Jaamacadda Carabta.
Shirkan Baqdaad ayaa la filayaa inuu fursad weyn u noqdo Soomaaliya si ay codkeeda uga maqashato arrimaha muhiimka ah ee gobolka iyo inay xoojiso iskaashiga ay la leedahay dalalka walaalaha Carbeed.
