Warar soo baxaya ayaa sheegaya in Taliyaha Hay’adda Nabad-sugidda iyo Sirdoonka Qaranka (NISA), Mahad Maxamed Salaad, uu xalay kulamo gaar ah la yeeshay xubno ka tirsan Madasha Samatabixinta Soomaaliyeed, iyadoo diiradda lagu saaray sugidda amniga caasimadda Muqdisho iyo bannaanbaxa mucaaradku ku baaqeen inuu dhaco 4-ta bisha Juun.
Kulamadan ayaa daba socda kulan hore oo dhex maray Taliyaha NISA iyo Madaxweynihii hore ee Soomaaliya, Shariif Sheekh Axmed, kaas oo sidoo kale looga hadlay xaaladda siyaasadeed iyo amniga dalka.
Ilo xog-ogaal ah ayaa sheegaya in dhinacyadu ay isla garteen muhiimadda ay leedahay in bannaanbaxyada la qorsheeyay u dhacaan si nabad ah, isla markaana laga hortago wax kasta oo sababi kara khalkhal amni ama isku dhacyo.
Dowladda Federaalka Soomaaliya ayaa hore u sheegtay in bannaanbax dhawaan ka dhacay Muqdisho ay ku lug lahaayeen ciidamo hubeysan oo la sheegay inay xiriir la leeyihiin xubno ka tirsan mucaaradka, arrintaas oo sare u qaadday walaaca la xiriira amniga isu-soo-baxyada siyaasadeed.
Kulamada u socda Taliyaha NISA iyo hoggaamiyeyaasha mucaaradka ayaa loo arkaa dadaal lagu xoojinayo wada-shaqeynta dhinacyada siyaasadda si loo ilaaliyo xasilloonida Muqdisho inta lagu jiro bannaanbaxyada la filayo.
