Wasiirka Gaashaandhigga XFS Axmed Macallin Fiqi, oo uu weheliyo Taliyaha Ciidanka Xoogga Dalka, Sarreeye-Gaas Odawa Yusuf Rage, ayaa maanta xafiiskiisa ku qaabilay Wakiilka Gaarka ah ee Guddoomiyaha Guddiga Midowga Afrika u qaabilsan Soomaaliya, ahna Madaxa Howlgalka Midowga Afrika ee Taageerada iyo Xasilinta Soomaaliya (AUSSOM), Danjire El Hadji Ibrahima Diene, ku-xigeenkiisa Mudane Mouktar Ousman Karie, iyo Taliyaha Ciidanka AUSSOM, Sareeye Guud Sam Kavuma.
Kulanka ayaa diiradda lagu saaray xoojinta wadashaqeynta iyo iskaashiga istiraatiijiyadeed ee u dhexeeya Wasaaradda Gaashaandhigga iyo Howlgalka AUSSOM, hirgelinta Qorshaha Kala-guurka Amniga, iyo dardargelinta howlgalada socda ee lagula dagaallamayo kooxaha Khawaarijta ah ee dalka dhibaateeya.
Wasiir Fiqi ayaa uga mahadceliyay AUSSOM doorka muuqda ee ay ka qaadanayaan sugidda amniga iyo xasillinta dalka, gaar ahaan Qaybta Koowaad, iyo kaalintooda howlgaladii ugu dambeeyay ee lagu xoreeyay magaalada Bariire ee gobolka Shabeellaha Hoose.
