Maxkamadda Gobolka Banaadir ayaa dib ugu celisay Xafiiska Xeer Ilaalinta kiiska loo haysto Sacdiyo Macallin Cali, oo loo yaqaan “Sacdiyo Bajaaj”, kaddib fadhigii maanta ay maxkamaddu ka yeelatay dacwadda.
Qareenka difaacaya eedeysanaha ayaa warbaahinta u sheegay in maxkamaddu ay ku qanci weyday eedaha ay soo gudbisay Xeer Ilaalintu, taasoo keentay in kiiska dib loogu celiyo si loo dhammaystiro caddeymaha iyo faahfaahinta la xiriirta dacwadda ka hor inta aan mar kale la horgeyn maxkamadda.
Sidoo kale, sida uu xaqiijiyay Abuukaate Cali Xalane, maxkamaddu waxay go’aankan gaartay kaddib dib u eegis ay ku samaysay kiiska iyo dacwadda loo haystay eedeysanaha.
Ilaa hadda ma jiro war rasmi ah oo faahfaahin dheeraad ah ka bixiyay sababta keentay dib u celinta eedeynta, hase yeeshee arrintan ayaa si weyn u soo jiidatay dareenka shacabka iyo baraha bulshada, maadaama kiisku uu muddooyinkii u dambeeyay ahaa mid si weyn loo hadal hayay.
Kiiskan ayaa sidoo kale Sacdiyo Bajaaj ka dhigay mid ka mid ah shaqsiyaadka sida weyn looga yaqaan baraha bulshada Soomaaliya, iyadoo dadweynuhu si dhow ula socdaan halka ay dacwaddani ku dambeyn doonto.
