Ururka Midowga Yurub ayaa si rasmi ah u soo dhaweeyay gogosha wada-hadal ee uu fidiyay Madaxweynaha Soomaaliya Xasan Sheekh Maxamuud, isagoo ku baaqay in dhammaan dhinacyada siyaasadda ay ka faa’iideystaan fursaddaas.
Midowga Yurub ayaa si gaar ah ugu baaqay siyaasiyiinta mucaaradka ah in ay ka qayb qaataan wada-hadallada, si xal waara looga gaaro khilaafaadka jira, isla markaana dalka looga saaro xaaladda kala guurka ah ee uu wajahayo.
War-saxaafadeed kasoo baxay Midowga Yurub ayaa lagu xusay in wada-hadal dhab ah iyo is-afgarad siyaasadeed ay yihiin waddada kaliya ee lagu xaqiijin karo xasillooni siyaasadeed iyo doorashooyin loo dhan yahay.
Sidoo kale, Midowga Yurub ayaa carrabka ku adkeeyay muhiimadda ay leedahay in la dhowro sharciga, isla markaana la helo hannaan doorasho oo hufan oo ay ku wada qanacsan yihiin dhammaan dhinacyada siyaasadda.
Midowga Yurub ayaa muujiyay inay sii wadi doonaan taageerada ay siiyaan Soomaaliya, gaar ahaan dhinacyada dowlad-dhiska, amniga, iyo dimuqraadiyadda, si dalka uu uga gudbo marxaladda kala guurka ah.
