Dowladda Federaalka Soomaaliya ayaa hawadeeda ka celisay diyaarad gaar ah oo sidday xubin ka tirsan Aqalka Odayaasha ee dalka Boqortooyada Midowday, taas oo qorsheynaysay inay ka degto magaalada Hargeysa.
Diyaaradda ayaa markii hore loo weeciyay dalka Jabuuti, halkaas oo ay saacado ku dul wareegtay, balse ugu dambeyn waxay oggolaansho ka heshay inay u gudubto oo ka degto magaalada Addis Ababa ee dalka Itoobiya.
Wararka la helayo ayaa tilmaamaya in tallaabadan ay la xiriirto feejignaan amni oo sare oo ay gashay dowladda Soomaaliya, kaddib cabsi laga qabay suurta galnimada in hoggaamiyaha Taiwan uu safar qarsoodi ah ku tago Somaliland. Arrintan ayaa kusoo beegmeysa xilli uu hoggaamiyaha Taiwan ku sugan yahay dalka Eswatini.
Ilaa hadda lama shaacin magaca mas’uulka saarnaa diyaaradda, mana jiro wax war rasmi ah oo kasoo baxay dowladda Federaalka Soomaaliya oo ku saabsan dhacdadan, taas oo sii kordhisay hadal-heynta iyo su’aalaha ku xeeran sababaha rasmiga ah ee ka dambeeyay go’aankan.
