Taliyaha Guud ee Ciidamada Difaaca Uganda (CDF), General Muhoozi Kainerugaba, ayaa ugu baaqay dalalka ciidamada ku leh Soomaaliya inay muujiyaan midnimo, wada-shaqeyn iyo go’aan adag si loo sii ambaqaado howlgalka Midowga Afrika ee AUSSOM, xilli uu wajahayo caqabado dhanka maalgelinta iyo taageerada saadka ah.
General Muhoozi ayaa hadalkan ka jeediyay shir aan caadi ahayn oo ay magaalada Kampala isugu yimaadeen Taliyeyaasha Ciidamada Difaaca ee dalalka ciidamada ku leh Soomaaliya. Shirka ayaa ka dhacaya Speke Resort Munyonyo, wuxuuna hordhac u yahay kulamada Wasiirrada Difaaca iyo Madaxda Dowladaha ee la qorsheeyay inay socdaan illaa 31-ka Luulyo.
Muhoozi ayaa sheegay in isbeddellada ku yimid taageerada saadka iyo yaraanta dhaqaalaha ay ka dhigan yihiin in dalalka howlgalka ka qeybgalaya ay yeeshaan qorshe mideysan si loo ilaaliyo guulaha laga gaaray amniga Soomaaliya.
Shirka waxaa ka qeybgalaya saraakiil ciidan iyo wufuud ka kala socota Uganda, Soomaaliya, Burundi, Jabuuti, Itoobiya, Masar iyo Kenya, kuwaas oo ka arrinsanaya mustaqbalka howlgalka AUSSOM iyo sidii loo xoojin lahaa dadaallada lagu sugayo amniga iyo xasilloonida Soomaaliya.
