Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa la filayaa inuu maanta magaalada Muqdisho kulan kula yeesho Taliyaha Ciidamada Mareykanka ee Afrika (AFRICOM), General Dagvin R.M. Anderson.
Sida wararku sheegayaan, kulanka ayaa diiradda lagu saari doonaa xaaladda amniga iyo siyaasadda dalka, xoojinta iskaashiga labada dhinac iyo dardargelinta howlgalada ka dhanka ah Al-Shabaab.
Kulankan ayaa imanaya maalin kadib markii General Anderson uu Muqdisho kula kulmay Ku-simaha Taliyaha Ciidanka Xoogga Dalka Soomaaliyeed ahna Taliyaha Ciidanka Dhulka, Sarreeye Guuto Sahal Cabdullaahi Cumar.
Kulankii shalay ayaa looga hadlay taageerada howlgalada ka dhanka ah argagixisada, xoojinta wada shaqeynta u dhexeysa Ciidanka Xoogga Dalka Soomaaliyeed iyo AFRICOM, iyo diyaar-garowga guluf ballaaran oo lagu beegsanayo kooxda Al-Shabaab.
Dowladda Mareykanka ayaa sidoo kale kulankaas ku xaqiijisay inay sii wadi doonto taageerada ay siiso Ciidanka Xoogga Dalka Soomaaliyeed, gaar ahaan dhinacyada howlgalada militari iyo la-dagaallanka argagixisada.
