Maamulka Puntland ayaa ka digay waxa uu ku tilmaamay qorshe lagu wiiqayo amniga iyo xasilloonida deegaannadeeda, isagoo sheegay in hub la sheegay in ay Dowladda Federaalka Soomaaliya soo gelisay gudaha Puntland loo adeegsan karo hurinta colaado iyo qalalaase amni.
Puntland ayaa sidoo kale shaacisay in la mamnuucay joogitaanka ciidamo aan ka tirsaneyn hay’adaha rasmiga ah ee amniga, iyadoo la adkeeyay kormeerka xuduudaha iyo dhaq-dhaqaaqyada la xiriira amniga.
Wararka kasoo baxaya Puntland ayaa sheegaya in maamulka uu ka walaacsan yahay qorshayaal uu ku eedeeyay Dowladda Federaalka iyo dhinacyo shisheeye, kuwaas oo uu sheegay inay ujeedkoodu yahay in la abuuro kala qeybsanaan iyo isku dhacyo beeleed oo ka dhaca deegaannada Puntland.
Mas’uuliyiinta Puntland ayaa ku dooday in isku dayo noocan oo kale ah ay soo jireen muddo dheer, balse aysan guul ka gaarin, iyagoo xusay in maamulka uu diyaar u yahay ilaalinta amniga iyo xasilloonida deegaannadiisa.
Dhanka kale, xaaladda siyaasadeed ee u dhexeysa Dowladda Federaalka iyo Puntland ayaa u muuqata mid sii xumaaneysa, iyadoo falanqeeyayaal badan ay tilmaamayaan in khilaafka hadda jira uu la mid yahay marxalado hore oo labada dhinac ay isku mari waayeen arrimo siyaasadeed iyo amni.
Puntland ayaa caddeysay in aysan aqbali doonin wax kasta oo halis gelin kara nabadda iyo amniga deegaannadeeda, iyadoo la sugayo sida ay Dowladda Federaalka uga jawaabto eedeymahan.
