Ra’iisal wasaare ku-xigeenka dalka Mudane Saalax Axmed Jaamac ayaa maanta kormeer shaqo ku tegay Machadka Daraasaadka Amniga ee hoos yimaada Hay’adda Nabadsugidda iyo Sirdoonka Qaranka Soomaaliyeed,isagoo u kuurgeliyay shaqooyinka muhiimka ah ee machadkan, gaar ahaan habsami u socodka imtixaanka dufcaddii 3aad ee ka qalinjabinaysa tan iyo markii machadka la aasaasay.
Ra’iisal wasaare ku-xigeenka dalka ayaa bogaadiyay maamulka iyo shaqaalaha Machadka oo shaqo muhiim u ah horumarinta amniga qaranka u haya dalka, wuxuu sidoo kale, hambalyo u diray ardayda soo gabagabeyneysa waxbarashadooda, iyagoo noqon doona laf-dhabarta xoojinta xasilloonida iyo horumarka dalkeenna.
Ugu dambeyn, wuxuu hoosta ka xariiqay in Machadkani tiir muhiim ah u yahay kaalin weynna ka qaatay soo saarista xirfadlayaal aqoon sare u leh amniga iyo la dagaallanka fikirka xagjirka. Ardayda machadka ka baxaysa waxay bartaan culuum muhiim u ah amniga qaranka, sida cilmiga dambiyada, falanqaynta khataraha, iyo la dagaallanka fikradaha waxyeellada leh ee bulshada lagu marin habaabinayo.
