Ra’iisul Wasaare Ku-Xigeenka Xukuumadda Federaalka Soomaaliya, Mudane Saalax Axmed Jaamac iyo wafdi uu hoggaaminayo ayaa ka qaybgalay Shirka 4aad ee Caalamiga ah ee Maalgelinta Horumarinta oo sanadkan lagu qabtay magaalada Seville ee dalka Spain.
Shirkan oo tobankii sanoba mar la qabto ayaa diiradda saaraya dib-u-eegista iyo hagaajinta qaab-dhismeedka nidaamka maalgelinta horumarinta caalamka, iyadoo la doonayo in la helo hannaan cadaalad iyo sinnaani ku dhisan oo u fududeeya dalalka nugul inay helaan maalgelin la awoodi karo, la heli karo, oo joogto ah.
Ra’iisul Wasaare Ku-Xigeenka oo hadal ka jeediyay madasha ayaa adkeeyay muhiimadda shirkan iyo baahida loo qabo isbeddel dhab ah oo lagu xaqiijinayo in nidaamka maaliyadeed ee caalamiga ahi uu si hufan ugu adeego dalalka nugul. Waxa uu sidoo kale iftiimiyay xaaladda Soomaaliya, guulaha ay ka gaartay dib-u-habeynta iyo dadaalka joogtada ah ee lagu dhisayo dhaqaale xasilloon oo loo dhan yahay.
Mudane Saalax Axmed Jaamac ayaa ugu dambeyn ku baaqay in la taageero dalalka nugul si ay u helaan maalgelin ku habboon oo waxtar leh, iyadoo la tixgelinayo duruufahooda gaarka ah, isla markaana la xoojiyo matalaaddooda go’aan-qaadashada nidaamka maaliyadeed ee caalamiga ah.
