Ra’iisul Wasaaraha Xukuumadda Jamhuuriyadda Federaalka Soomaaliya,Xamsa Cabdi Barre, ayaa maanta si rasmi ah u daahfuray hirgelinta siyaasadda darajooyinka iyo mushaaraadka shaqaalaha rayidka ee dowladda, taas oo qeyb ka ah dadaallada Xukuumadda DanQaran ee lagu horumarinayo maamulka iyo hufnaanta adeegyada dowliga ah.
Munaasabadda daahfurka oo ka dhacday xarunta Madaxtooyada Qaranka ayaa waxaa goobjoog ka ahaa Wasiirro, Agaasimayaal Guud, Madax ka socotay Hay’adaha Dowladda, iyo marti sharaf kale. Ra’iisul Wasaaraha ayaa xusay in siyaasaddan ay muhiim u tahay xoojinta nidaamka mushaar bixinta, kor u qaadidda hufnaanta maamulka, iyo abuurista jawi shaqo oo caddaalad iyo tartan furan ku dhisan.
“Hirgelinta siyaasaddan waxay horseedi doontaa nidaam shaqo oo cadaalad ah, iyadoo si caddaalad ah loo kala darajoeyn doono shaqaalaha rayidka, lana hubin doono in mushaarkooda uu noqdo mid ku habboon darajooyinka iyo shaqooyinka ay hayaan,” ayuu yiri Ra’iisul Wasaare Xamsa.
Siyaasaddan cusub ayaa la rajeynayaa inay soo afjarto is-faham la’aanta iyo kala duwanaanshaha baahsan ee ka jiray darajooyinka shaqaalaha dowladda, iyadoo la sameynayo hannaan cad oo lagu qiimeeyo shaqaalaha laguna go’aamiyo mushaharka ay xaqa u leeyihiin. Waxay sidoo kale xoojin doontaa dhiirigelinta shaqaalaha si ay uga qeyb qaataan horumarinta adeegyada bulshada iyo dhismaha dowladnimada.
