Ra’iisul Wasaaraha Xukuumadda Federaalka Soomaaliya Xamsa Cabdi Barre ayaa ka hadlay xaaladda guud ee dalka, isagoo sheegay in dowladda Federaalka Soomaaliya ay diyaar u tahay dhageysiga aragtida siyaasiyiinta ka aragtida duwan dowladda, balse aan la aqbali karin wax kasta oo halis gelin kara amniga iyo xasilloonida dalka.
Ra’iisul Wasaaraha ayaa sheegay in dowladda ay mudnaan gaar ah siinayso ilaalinta nabadda iyo dowladnimada, isagoo shacabka Soomaaliyeed ugu baaqay inay door muuqda ka qaataan xoojinta amniga iyo wadajirka bulshada.
“Siyaasi ay madax martay shahwada xukunka yuusan si fudud u waxyeeleyn amnigaas qaaliga ah ee aan haysanno,” ayuu yiri Ra’iisul Wasaare Xamsa Cabdi Barre.
Sidoo kale, wuxuu carrabka ku adkeeyay in dowladda Soomaaliya ay diyaar u tahay wadahadal iyo dhageysiga aragtiyada kala duwan ee siyaasadeed, balse aysan aqbali doonin falal lagu qalqal gelinayo amniga iyo xasilloonida dalka.
Hadalkan ayaa kusoo aadaya xilli ay sii kordhayaan xiisadaha siyaasadeed iyo khilaafaadka la xiriira arrimaha doorashooyinka iyo mowqifyada mucaaradka dalka.
