Ugu yaraan saddex qof ayaa ku dhintay, halka laba askari oo boolis ah ay ku dhaawacmeen kadib weerar ka dhacay meel u dhaw dhismaha qunsuliyadda Israaill ee magaalada Istanbul, sida ay qoreen warbaahinta Turkiga.
Muuqaallo ay baahisay wakaaladda wararka ee Reuters ayaa muujinaya askari boolis ah oo bastoolad la baxaya islamarkaana gabaad ka dhiganaya meel u dhow goobta,
iyadoo la maqlayo dhawaqa rasaas isdaba joog ah.
Sidoo kale, hal qof ayaa lagu arkay isagoo dhiig ku daadanayo goobta dhacdadu ka dhacday.
Wararka hordhaca ah ayaa tilmaamaya in weerarka uu si lama filaan ah uga dhacay meel xasaasi ah, taas oo keentay in si degdeg ah loo adkeeyo ammaanka aaggaas.
Ilaa iyo hadda lama shaacin cidda ka dambeysay weerarka, mana cadda sababta rasmiga ah ee falkaasi.
Mas’uuliyiinta Turkiga weli kama aysan bixin war rasmi ah oo faahfaahsan, waxaana socda baaritaanno lagu ogaanayo xaqiiqada dhacdada.
