Safiirka dowladda Soomaaliya ee dalka Kenya Danjire Jabriil Ibraahim Cabdulle ayaa xafiiskiisa ku qaabbilay Danjiraha Jamhuuriyadda Kuuriyada Koonfureed ee dalka Kenya Ambassador KANG Hyung-shik.
“Waxaa maanta xarunta Safaaradda ku qaabilo H.E. KANG Hyung-shik, Danjiraha Jamhuuriyadda Kuuriyada Koonfureed oo aan ka wada hadalnay xoojinta xiriirka laba geesoodka ah ee u dhexeeya Soomaaliya iyo Jamhuuriyadda Korea.
Labada dal ayaa hadda waxa ay ka wada tirsanyihiin xubnaha aan joogtada ahayn golaha ammaanka ee Qaramada Midoobay”. Ayuu yiri Danjire Jabriil.
Danjiraha ayaa bidhaamiyay in labada dhinac ay kulankooda diiradda ku saareen dardargelinta arrimaha quseeya danaha wadaagga ah ee labada dal.
Danjire Jabriil Ibraahim Cabdulle ayaa hadalkiisa ku soo gunaanaday. “Waxaan mar kale xaqiijinay sida ay nooga go’antahay xoojinta iskaashiga iyo cilaaqaadka laba geesoodka ah iyo sare u qaadidda wada shaqayn ballaaran oo dhexmarta Somalia iyo Korea.
Danjiraha dowladda Soomaaliya ee dalka Kenya ayaa dadaalo xooggan ugu jira sidii loo xoojin lahaa xiriirka diblomaasiyadeed ee ay Soomaaliya la leedahay dalalka caalamka, taasi oo iminka laga dareemayo galaangalka siyaasadeed ee ay Soomaaliya ku leedahay Caalamka.
