Qaramada Midoobay ayaa sheegtay in jidhka dumarku uu noqday waxyaalagu dagaal ahaanta loo isticmaalayo ee ka taagan Suudaan, halkaas oo afduubka iyo kufsigu si joogto ah loogu isticmaalayo hub dagaal laba sano kadib markii dagaalkaasi bilowday. Xoghayaha Guud ee Qaramada Midoobay, Antonio Guterres, ayaa sheegay in tacaddiyo ay geysanayaan labada dhinac ee dirirtu ka dhexeysaa — ciidanka Suudaan iyo xoogagga sida millitariga u tababaran ee RSF.
Wuxuu sidoo kale xusay weerarrada lagu hayo shaqaalaha gargaarka. Lama yaqaan xaaladda dadka ka shaqaynayay xerada qaxootiga ee Zamzam ee gobolka galbeed ee Darfur, taas oo gacanta u gashay RSF. Waxaa kor u sii kacaya walaaca laga qabo boqollaal kun oo barakacayaal ah kadib markii RSF ay qabsatay deegaankaas. Hay’adda caafimaadka ee MSF ayaa sheegtay in carruur qaar u dhinteen harraad xilli ay lug kusoo socdaalayeen ilaa 70km si ay uga baxsadaan rabshadaha. Qaramada Midoobay ayaa sidoo kale xustay in aysan haysanin dhaqaalihii ay ku caawin lahaayeen malaayiinta dagaalku barakiciyay.
